— 20 Resultados por páxina
Mostrando o intervalo 1 - 20 de 24 resultados.

O prazo para que os gandeiros e agricultores galegos soliciten as axudas da PAC amplíase ata o 15 de xuño

O Diario Oficial de Galicia publica hoxe a orde que modifica a emitida o 12 de febreiro, para dar resposta ás restricións impostas por mor do coronavirus
  • Así, as solicitudes únicas poderán presentarse ata o día 15 do mes que vén, e calquera modificación ou alegación, ata o día 30
  • As achegas están dotadas con máis de 216 millóns de euros, dos que 170 millóns corresponden a pagos directos da PAC e máis de 46 millóns a medidas de desenvolvemento rural asimiladas ao Sistema Integrado de Xestión e Control

Santiago de Compostela, 5 de maio de 2020.- O Diario Oficial de Galicia (DOG) publica hoxe a orde da Consellería do Medio Rural que amplía ata o 15 de xuño o prazo que teñen os agricultores e gandeiros galegos para solicitar as axudas da PAC. A orde modifica a emitida o pasado 12 de febreiro co obxectivo de dar resposta ás restricións levadas a cabo por mor do coronavirus, que impediron que moitos interesados se puidesen achegar aos bancos ou ás entidades de aconsellamento que colaboran coa administración para a tramitación destas achegas.

Deste xeito, a orde establece que as solicitudes únicas destas axudas se poderán presentar de xeito telemático ata o 15 de xuño. Mentres, finalizará o día 30 do mes que vén tanto o prazo de modificación das solicitudes únicas como o prazo de presentación das solicitudes de alegación do SIXPAC e das comunicacións da cesión de dereitos de pagamento básico.

Cabe lembrar que o orzamento previsto para esta convocatoria se eleva aos 216 millóns de euros, dos cales 170 millóns corresponden aos pagamentos directos á agricultura e á gandaría e ás axudas ao desenvolvemento rural suxeitas ao Sistema Integrado de Xestión e Control, as coñecidas como axudas da PAC. Os outros máis de 46 millóns de euros irán dirixidos ás medidas de desenvolvemento rural (axudas a zonas con limitación naturais, agroambiente e clima, agricultura ecolóxica e para o mantemento de plantacións forestais en terras non agrícolas).

Prevese que uns 27.000 agricultores e gandeiros soliciten estas achegas, que xestiona o Fondo Galego de Garantía Agraria e que son de gran interese para o sector primario. Grazas a estas axudas conséguense reducir as diferenzas entre a renda agraria e a urbana, á vez que se potencia os agricultores realmente activos e prácticas agrícolas beneficiosas para o clima e o medio ambiente.

A Consellería do Medio Rural traballa con máis de 50 entidades colaboradoras para prestar apoio ás persoas interesadas nestas achegas, como son as entidades bancarias, asociacións agrarias, organizacións profesionais e as entidades de aconsellamento.

Enlace á orde no DOG

https://www.xunta.gal/dog/Publicados/2020/20200505/AnuncioG0426-040520-0001_gl.html