Coa aplicación desta submedida preténdese fomentar a creación de servizos destinados ás explotacións agrarias, tanto de xestión, entendidos como o conxunto de actuacións que se desenvolven nunha explotación agraria co fin de deseñar un programa técnico, coma de substitución, consistentes no apoio por parte dun traballador dunha entidade de substitución acreditada que acudirá ás explotacións agrarias co fin de axudar nas actividades propias e específicas da explotación agraria

Esta submedida desenvólvese a través dunha axuda outorgada á prestación de servizos de asesoramento a persoas físicas ou xurídicas titulares dunha explotación agrícola, gandeira ou forestal. A asesoría poderá expresarse como consulta única ou como prestación continuada no marco dunha relación pactada entre prestador e prestatario.

Esta axuda fomenta a realización de actividades de demostración e información para profesionais ou futuros profesionais dos sectores da agricultura, gandería, industria agroalimentaria e cadea forestal-madeira.

Consideraranse de especial importancia as accións dirixidas a mozos e mulleres do medio rural galego.

A submedida promoverá a realización de actividades de formación e adquisición de competencias para profesionais ou novas incorporacións aos sectores da agricultura, gandería, industria agroalimentaria e cadea forestal-madeira.